செந்தில் பாலாஜியால் தமிழகத்திற்கு தலைகுனிவு.! புதுச்சேரி அதிமுக குற்றச்சாட்டு.!

புதுச்சேரி மாநில அதிமுக செயலாளரும் முன்னாள் சட்டமன்ற கட்சி தலைவருமான அன்பழகன் இன்று பேட்டியின் செய்தியாளர்களிடம் கூறியதாவது,

பாஜகவின் தமிழக மாநில தலைவர் அண்ணாமலையின் பொறுப்பற்ற தவறான பேச்சுக்கு நேற்றைய தினம் எங்களின் அதிமுக பொதுச்செயலாளர் எடப்பாடியார் அவர்கள் பெருந்தன்மையோடு ஒரு கண்டன தீர்மானத்தை மட்டும் நிறைவேற்றினார். அந்த கண்டன தீர்மானத்திற்கு பதிலளிக்கும் விதமாக கூட்டணியில் இருப்பதற்காக மற்ற கூட்டணி கட்சிகளின் எண்ணத்திற்கு ஏற்ப கருத்து கூறுவது பொறுத்தமற்றது என அண்ணாமலை கூறிள்ளார்.

கூட்டணி கட்சியில் இருப்பதால் கூட்டணி கட்சிகளிண் எண்ணத்திற்கு ஏற்ப செயல்பட முடியாது என கூறும் அண்ணாமலைக்கு, கூட்டணி கட்சியில் இருந்து கொண்டே பிரதான கூட்டணி கட்சியான அதிமுகவை பற்றி குறை கூற எந்த நியாயமும் இல்லை என்பதை அண்ணாமலை உணர வேண்டும்.

திமுக அரசின் முதலமைச்சர் ஸ்டாலின் அவர்களுக்கு வலது, இடது கரமாக செயல்பட்டு வரும் மின்சார கலால்துறை அமைச்சர் செந்தில் பாலாஜி மீது வருமான வரித்துறை மற்றும் அமலாக்கத்துறை தற்போது எடுத்து வரும் நடவடிக்கையால் இந்திய அளவில் ஒட்டுமொத்த தமிழத்திற்கும் தலைகுனிவு ஏற்பட்டுள்ளது. அமலாக்கத்துறையின் பெறப்பட்ட குற்றச்சாட்டுகளின் ஆதாரங்களை தலைமை செயலகத்தில் சட்டமன்றத்தில் தனது அமைச்சரவையில் செந்தில்பாலாஜி பதுக்கி வைத்ததின் அடிப்படையில் சட்டமன்றத்தில் உள்ள அமைச்சர் அறையில் அமலாக்கத்துறை சோதனை நடத்தி பல்வேறு ஆதாரங்களை கைப்பற்றி உள்ளனர்.

இதுபோன்ற சோதனையின் போது தமிழக ஆளும் திமுக அரசை சார்ந்தவர்கள் வானத்திற்கும் பூமிக்கும் குதித்து அமைச்சருக்காக தேசிய தலைவர்களிடம் எல்லாம் பேசி மத்திய அரசுக்கு கண்டனம் தெரிவித்துக்கொண்டிருப்பது சரியானது இல்லை.

தற்போது திமுக முதலமைச்சராக உள்ள திரு ஸ்டாலின் அவர்கள் கடந்த 2 ஆண்டுகளுக்கு முன்பு செந்தில் பாலாஜியை பற்றி பேசும் போது ஊழல், முறைகேடுகள், தன்னை எதிர்த்தவர்களை கொலை செய்ய மிரட்டுவது, அதிகார மையத்தில் உள்ள பெண்களுடனான தொடர்புகள் போன்ற குற்றச்சாட்டுகளை செந்தில் பாலாஜி மீது சுமத்தினார். அவரது குற்றச்சாட்டை தொடர்ந்து தற்போது நடைபெறும் அமலாக்கத்துறை சோதனையின் போது செந்தில் பாலாஜிக்கா வரிந்து கட்டிக்கொண்டு துணை போவது ஏன் என்பதை மக்கள் உணர்ந்து கொள்ள வேண்டும்.

மாதத்திற்கு சுமார் 300 கோடி ரூபாய்க்கு மேல் கலால்துறையில் மட்டும் லஞ்சமாகவும், முறைகேடாகவும் பெற்று ஸ்டாலின் குடும்பத்திற்கு வரி செலுத்தி வந்தவர் தான் செந்தில் பாலாஜி. அந்த பாசத்தில் தான் என்ன செய்கிறோம் என்று செய்வதரியாது திகைத்து நிற்கிறார். தனது கூட்டணி கட்சிகளின் தேசிய தலைவர்களிடம் வற்புறுத்தி செந்தில் பாலாஜிக்கு ஆதரவாக அறிக்கைவிட வைக்கிறார்.

கடந்த அதிமுக ஆட்சியில் தலைமை செயலகத்தில் சோதனை நடைபெற்ற போது குற்றத்திற்கான ஆதாரங்கள் தலைமை செயலாளர் அறையில் இருப்பதால் சோதனை செய்யத்தானே செய்வார்கள் என்று வியாக்கானம் பேசியவர் அப்போதைய எதிர்கட்சி தலைவர் ஸ்டாலின் ஆவார். தற்போது குற்றச்சாட்டுக்கான ஆதாரங்கள் சம்பந்தப்பட்ட அமைச்சர் அறையில் இருப்பதற்கு நடைபெற்ற சோதனைக்கு மாநில உரிமை பறிபோய்விட்டது. கூட்டாட்சிக்கு எதிரானது என்று திரு ஸ்டாலின் கூறுவது வியப்பாக உள்ளது.

செந்தில் பாலாஜி அமைச்சர் பதவியில் இருந்து இந்த ஊழல் நடைபெற்றதாக இருந்தால் ஸ்டாலின தலைமையிலான இந்த அமைச்சரவையையும், அரசையும் மத்திய அரசு உடனடியாக டிஸ்மிஸ் செய்ய வேண்டும்.

இளநிலை மருத்துவ கல்வியில் இந்திய அளவில் பொது கவுன்சில் நடத்தப்படும் என்று மத்திய அரசு அறிவித்துள்ளது. இது மாநில உரிமையை பறிக்கும் செயலாகும். தமிழகம் மட்டுமல்ல புதுச்சேரியிலும் இடஒதுக்கீடு, உள் ஒதுக்கீடு, பிராந்திய ரீதியான ஒதுக்கீடுகள் பாதிக்கப்படும். தமிழகத்தில் மாண்புமிகு எடப்பாடியார் அவர்கள் கொண்டுவந்த அரசு பள்ளி மாணவர்களுக்கான ஏழரை சதவீத உள்ஒதுக்கீடு பாதிக்கப்படும். அதனால் தான் மாணவர்களின் நலனுனுக்காக எங்களது பொதுச்செயலாளர் எடப்பாடியார் அவர்கள் இந்த தேசிய அளவிலான மருத்தவ கவுன்சிலிங் திட்டத்தை உறுதியாக எதிர்த்துள்ளார்.

இந்த தேசிய அளவிலான பொது கவுன்சிலால் புதுச்சேரியில் மாணவர்கள் நிச்சயம் பாதிக்கப்படுவார்கள். ஆனால் துணைநிலை ஆளுநர் தமிழிசை இதனால் மாணவர்கள் பாதிக்கப்படமாட்டார்கள் என கூறுவது ஏற்புடையது அல்ல.

மத்திய அரசாங்கத்தின் இந்த மாணவர்கள் விரோத செயலை புதுச்சேரி அரசு உறுதியாக எதிர்க்க வேண்டும். முதலமைச்சர் ரங்கசாமி உடனடியாக அமைச்சரவையை கூட்டி இதில் சரியான முடிவை எடுக்க வேண்டும்.

இவ்வாறு அவர் கூறினார்.

உடன் மாநில கழக பொருளாளர் ரவி பாண்டுரங்கன், புதுச்சேரி நகர கழக செயலாளர் அன்பழகன் உடையார் ஆகியோர் உடனிருந்தனர்.