மதுபானத்திற்கு அரசு சார்பில் தனி கார்ப்பரேஷன் அமைக்க அதிமுக வலியுறுத்தல்.!

புதுச்சேரி மாநில அதிமுக செயலாளரும், முன்னாள் சட்டமன்ற கட்சி தலைவருமான அன்பழகன் இன்று தலைமை கழகத்தில் செய்தியாளர்களிடம் பேட்டியளித்தார். அப்பொழுது அவர் கூறியதாவது:

புதுச்சேரியில் ஆட்சி செய்யும் எந்த அரசாக இருந்தாலும் மதுபான கொள்கையில் தள்ளாட்டத்துடன் இருக்கிறது. புதுச்சேரி மாநிலத்திற்கு மக்கள் நலன் சார்ந்த திட்டங்களை செயல்படுத்த போதுமான வருவாய் தேவை என்ற நிலையில் பொதுமக்களுக்கு பாதிப்பு இல்லாத வகையில் மதுபான கொள்கையில் சரியான நடவடிக்கையை அரசு எடுத்தால் ஆண்டுக்கு 1000 கோடி ரூபாய் அளவில் அரசுக்கு வருவாய் கிடைக்கும். குறிப்பிட்ட ஒரு சிலருடைய நன்மைக்காகவும் ஒருசிலர் அரசியல் கட்சியில் உள்ள இந்த தொழில் புரிபோரின் நலனுக்காகவும் திட்டமிட்டு அரசு அரசுக்கு வரவேண்டிய வருவாயை தொடர்ந்து இழந்து வருகிறது.

புதுச்செரியில் 8-க்கும் மேற்பட்ட டிஸ்ரிகள் உள்ளன. அங்கு உற்பத்தி செய்யும் சரக்குகள், வெளிமாநிலங்களில் இருந்து 800-க்கும் மேற்பட்ட பிராண்டு சரக்குகளை அரசே கொள்முதல் செய்து, அதற்காக தனி கார்பரேஷன் அமைத்து சில்லரை கடைகளுக்கு விநியோகம் செய்தால் 1000 கோடிக்கு மேல் வருவாய் கிடைக்கும்.

1989-ம் ஆண்டு மக்கள் தொக்குக்கு ஏற்ப மொத்த மதுபான விற்பனை கடை FL-1 சுமார் 80-க்கும், சில்லரை மதுபான விற்பனை கடை FL-2 சுமார் 250-க்கும் லைசன்ஸ் வழங்கப்பட்டது. அதன் பிறகு எந்த தனியாருக்கும் சில்லரை விற்பனை கடைகளுக்கு அனுமதி வழங்கப்படவில்லை. டூரிஸ்ட் லைசன்ஸ் என்ற பெயரில் கடந்த திமுக காங்கிரஸ் ஆட்சியில் 55 லைசன்சும். தற்போதைய அரசில் சுமார் 95 லைசன்சும் வழங்கப்பட்டுள்ளது. இந்த டூரிஸ்ட் லைசன்ஸ் என்பது 15 ஏசி ரூம் மற்றும் 300 சதுர அடி ஹால் ஆகியவை இருக்க வேண்டும். ஆனால் தற்போது இதுபோன்ற வசதிகள் இல்லாதவர்களுக்கும் டூரிஸ்ட் லைசன்ஸ் வழங்கப்பட்டுள்ளது. இதை தான் அனைவரும் ரெஸ்டோபார் என்று சொல்லிக்கொண்டு பொதுமக்களுக்கு தொல்லையும், கலாச்சார சீரழிவையும் ஏற்படுத்தி வருகின்றனர். ரெஸ்டோ பார் என்ற பெயரில் இதுவரை கலால்துறை லைசன்ஸ் வழங்காத சூழ்நிலையில் இதை கூட மக்களிடம் கலால்துறை தெளிவுபடுத்தவில்லை.

இந்த டூரிஸ்ட் லைசன்ஸ்களுக்கு ஒரு வருடத்திற்கு 6 லட்சம் வீதம் மொத்தமுள்ள 155 லைசன்சுக்கும் சுமார் 10 கோடி ரூபாய் தான் வருவாய் கிடைக்கும். ஆனால் புதியதாக 100 FL-2 லைசன்சுகளை ஏலம் விட்டாலே குறைந்த்து ஆண்டுக்கு 200 கோடி ரூபாய்க்கு மேல் வருவாய் வரும்.. அதையும் அரசு செய்யவில்லை. கள்ளுக்கடை, சாராயக்கடை ஏலம் விடுவது போன்று மதுபான விற்பனை உரிமத்தையும் 5 ஆண்டுக்கு ஒருமுறை ஏலம் விட்டால் தற்போது உள்ளதை விட பல மடங்கு வருவாய் வரும். அதையும் அரசு செய்யவில்லை.

முதலமைச்சரின் கன்னோட்டத்தில் மாற்றம் தேவை. மக்களுக்க தொல்லை கொடுக்கும் வகையில் உள்ள டூரிஸ்ட் பாரை ரத்து செய்துவிட்டு எப்.எல்.2 ஏலம் கொடுத்து 100 லைசன்ஸ் கொடுத்தால் 340 கோடி ரூபாய் அளவிற்கு வருவாய் கிடைக்கும். முதலமைச்சரிடம் துறையின் அதிகாரிகள் சரியான விபரத்தை எடுத்துக் கூறாத்தால் அரசின் வருமானம் வீணடிக்கப்பட்டு வருகிறது.

புதுச்சேரியில் கடந்த சில நாட்களாக பெண்களுக்கு என்று தனி பார் என்ற விளம்பரம் செய்யப்பட்டது. மேலும் பீர் பஸ் இயக்கப்படும் என கட்டுமரான் என்ற பீர் நிறுவனம் விளம்பரப்படுத்தி உள்ளனர்.

புதுச்சேரி கலால் சட்டம் 1970 கலால் விதி எண் 192 (2)ன் படி மதுபான உற்பத்தி மற்றும் விற்பனை சம்பந்தப்ட்ட எந்தவித சிறு விளம்பரங்களும் செய்யக்கூடாது. மதுபானம் தொட்பான விளம்பர பதாகைகள், மதுபான விற்பனைக்கு பரிசு பொருட்கள், செய்தி தாளில் விளம்பரம், சமூக வலைதளங்களில் விளம்பரம் ஆகியவை சட்டத்திற்கு விரோதமானது.

பீர் பஸ்சுக்கு விளம்பரம் செய்து வருகின்றனர். இவர்கள் மிது ஏன் கலால்துறை நடவடிக்கை எடுக்கவில்லை. குறைந்தபட்சமாக அவர்களின் அனுமதியை தற்காலிகமாக ரத்து செய்து இருக்கலாம். புதுச்சேரி முழுவதும் பல்வேறு இடங்களில் இளைஞர்கள் ஒன்ற சேர்ந்து குடிப்பது. அரசுக்கு சொந்தமான பொது இடங்களிலும் மது குடிக்கும் இடமாக மாற்றப்பட்டுள்ளது. காவல்துறை இதன் மீது ஏன் நடவடிக்கை எடுக்கவில்லை.

கலால்துறை சார்பில் பீர் பஸ்சுக்கு அனுமதி கொடுக்கவில்லை என்றால். யார் கொடுத்தது. இதுகுறித்து அரசு உரிய விளக்கத்தை அரசு தெரிவிக்க வேண்டும்.

இவ்வாறு அவர் கூறினார். பேட்டியின் போது மாநில கழக அவைத் தலைவர் அன்பானந்தம், மாநில கழக பொருளாளர் ரவி பாண்டுரங்கன், புதுச்சேரி நகர செயலாளர் அன்பழகன் உடையார்,, மாநில கழக துணைச் செயலாளர் நாகமணி, மாநில அண்ணா தொழிற்சங்கப் பேரவை செயலாளர் பாப்புசாமி ஆகியோர் உடனிருந்தனர்.